Reykjavíkurmaraþon

Nú framundan er Reykjavíkurmaraþon og því fylgir ávallt heljar mikið tilstand enda margir að stíga sín fyrstu skref í 10, 21,1 og maraþoni.  

Mikil umræða hefur verið um aðstoð og vilja sumir meina að hvatning og það að hjóla með fólki og gefa því kók eða orkudrykk sé ólögleg utanaðkomandi aðstoð.  Þvílíkt anskotans kjaftæði sem það er! 

Frá því að ég byrjaði að hlaupa þá hefur alltaf verið lagt mikið í það að styðja byrjendur í hlaupum og líka þá sem vilja ná PB.   Þess utan hafa margir ekki getað drukkið þá drykki sem eru í boði eða vilja hafa sína eigin drykki t.d. átti ég í erfiðleikum með blá Poweradin lengi vel og lét alltaf einhvern geyma minn eigin orkudrykki í hlaupum heima.  Það er jafnmikið sport fyrir aðstandendur og vini að aðstoða sitt fólk eins og fyrir keppendur að taka þátt.  T.d. er það alvanalegt að í maraþonum erlendis að hlauparar láti sitt fólk vera með drykki á leiðinni, enda er það ekki bannað.  Einungis ætlast til að hlauparar hlaupi tilgreinda vegalengd. 

Að þessu sögðu þá er vert að benda á það að í Tour du France eru óskráðar reglur þess efnis að ef einn af fremstu mönnum lendir í vandræðum t.d. keðjan fer af þá bíða hinir eftir honum (amk skyldist mér það á frétt um daginn).  Það er nefninlega heimska að það þurfi að vera reglur til um allt, það er nóg að gera kröfu til fremstu hlauparanna þ.e. þeir sem eru í baráttu um verðlauna sæti að þeirra árangur sé óumdeildur að keppni lokinni.  Þá er t.d. stór munur á því hvort keppendur mæti með utankomandi og planlagðan pacer í keppni eða hvort einhver slæst í för með keppendanum.  

Mér vitanlega er engin almenningskeppni á Íslandi haldin með fyrirfram skilgreindum reglum og engin að ég held undir merkjum ÍSÍ eða annars sambands og hafa þau því enga lögsögu til að ákveða hvort eitt eða annað sé ólöglegt en geta að sjálfsögðu verið leiðbeinandi aðili.  Correct me if I´m wrong!

Þannig að ekki láta umræðu undafarnar vikur trufla ykkur, aðstoðið ykkar fólk í brautinni eins og þið best getið, hvort sem það er hvatning, kók eða snickers!!:)

Athugasemdir

[Corinna (IP-tala skráð) 17.8.2010 kl. 10:53]

Takk fyrir góð orð.

[Sæll Börkur (IP-tala skráð) 17.8.2010 kl. 15:02]

Sæll Börkur

Nú er ég ekki alveg sammála þér. Ætla ekki að fara nánar út í það en vil benda á að það er mikill munur á hvort hjólað er með einhverjum hlaupara alla leið í maraþoni og allt sem á að borða og drekka á meðan á hlaupinu stendur sé á hjólinu eða hvort einhver standi á götuhorni og rétti hlauparanum nýja flösku af sínum extra drykk. Í þeim ofurmaraþonum sem ég hef farið í geta hlaupararnir yfirleitt sent út sína næringu og annað sem maður vill hafa fyrir sig á ákveðna staði. Þetta þekkir þú vel. Það er jafnvel oft hægt í maraþonum. Það er hins vegar bannað í slíkum hlaupum að utanaðkomandi aðilar skiptist á um að hlaupa með einstökum hlaupurum og halda á byrðinni fyrir þá. Hlauparar brjóta gjarna vindinn fyrir hvorn annan og skiptast þá um hver sé fyrstur í að brjóta. Það er hins vegar bannað að hafa utanaðkomandi aðila á brautinni sem skiptast á um að brjóta vindinn fyrir vini sína. Meginmálið er að það standi allir jafnt að vígi hvað utanaðkomandi aðstæður varðar.  IAU hefur gefið út reglur um framkvæmd ofurhlaupa og síðan hafa þær verið útfærðar nánar í einstökum löndum. Þetta er gert svo afrek og þar með afrekaskrár séu sambærilegar hvað framkvæmd hlaupa varðar. Ef framkvæmd ofurhlaups er á einhvern hátt þannig úr garði gerð að hún þyki ekki standast eðlilegar ákveðnar lágmarkskröfur þá getur FRÍ sem aðili að IAU neitað að viðurkenna unnin afrek í slíku hlaupi inn á afrekaskrár. Hins vegar er um að gera að styðja og hvetja sitt fólk og alla aðra hlaupara allt hvað af tekur innan þeirra marka sem eðlileg teljast.

Gangi þér svo sem best í UTMB

Mbk

Gunnlaugur

[Bibba (IP-tala skráð) 17.8.2010 kl. 15:54]

Ég er sammála þér Börkur.    Það þarf að passa upp á hlutverk vina og aðstandenda og það að þeir geti áfram tekið þátt á sinn hátt.
Í UTMB eru jú reglur um að ekki meigi hlaupa með þáttakendum en í staðinn eru líka fríar rútuferðir á milli staða þar sem aðstandendur geta ferðast á milli og aðstoðað sína menn á drykkjarstöðvum.

[Börkur (IP-tala skráð) 18.8.2010 kl. 09:46]

Alveg sammála þér Gunnlaugur enda segi ég að legg það ekki að jöfnu að vera með utanaðkomandi planlagðan meðhlaupara og einhvern sem slæst í för.  T.d. í hundrað kílómetra hlaupinu þá voru heilu hlaupahóparnir að hlaupa með fólki og sýna hlaupurum þannig stuðning. 

FRÍ getur að sjálfsögðu ekkert sagt enda ultrahlaup ekki haldin undir þeirra merkjum.  Það getur þó orðið í framtíðinni og ég tali nú ekki um ef við næðum IAU stimpli á 100 km/24 km hlaup sem þurfa þá að uppfylla ákv. skilyrði. 

Samt er best að vera sem minnst háður reglum og að keppendur keppi af heiðarleika til að árangur þeirra verði ekki umdeildur. 

[Gunnlaugur Júlíusson (IP-tala skráð) 18.8.2010 kl. 14:08]

Sæll Börkur.

Gott að taka smá umræðu um þetta mál.

Þegar ég tók þátt í 100 km hlaupinu á Borgundarhólmi árið 2004 þá sá ég ekki einn einasta utanaðkomandi hlaupara sem var að hlaupa með þeim sem hlupu í hlaupinu. Sama var í Odense árið 2006. Veit ekki hvort það var formlega bannað en mér kæmi það ekki á óvart. Í hlaupi eins og Spartathlon getur enginn bannað fólki að vera á hlaupum á þessari leið á meðan hlaupið stendur yfir en það er fylgst mjög með að ekki sé um utanaðkomandi aðstoð að ræða. Í sumum lengri hlaupum er aðstoðarfólki einungis leyft að vera til staðar á fyrirfram ákveðnum drykkjarstöðvum. Að mínu mati er það ekkert sjálfsagt að hópar óviðkomandi fólks séu hlaupandi á brautinni þegar keppnishlaup fer fram. Jafnvel þótt um sé að ræða vini og kunningja einstakra hlaupara. Það er nefnilega mjög erfitt að skilja á milli óformlegs stuðnings og beinnar aðstoðar þegar fólk er að hlaupa með kunningjum sínum í keppnishlaupi.  Þess vegna er best að hafa allar línur sem skýrastar svo ekki komi upp leiðindi eftir á. IAU (International Association of Ultrarunners) eru alþjóðasamtök ofurhlaupara. FRÍ er aðili að IAU fyrir Íslands hönd. Hægt er t.d. að sækja um gæðavottun á hlaupum til samtakanna (gull, silfur og brons). Ofurhlaup eru í grófum dráttum tvennskonar. Hlaup sem ekki eru samanburðarhæf og hlaup sem eru samanburðarhæf. Fjallahlaup eru ekki samanburðarhæf þar sem aðstæður eru svo misjafnar. Þar er árangur einungis borinn milli ára og hlaupara saman innan hlaupsins ef segja má sem svo. WS og UTMB eru t.d. ólík hlaup og árangur ekki samanburðarhæfur þrátt fyrir að þau séu álíka löng svo dæmi sé nefnt. Árangur í ofurhlaupum sem haldin eru á brautum eða stígahlaup sem eru haldin við staðlaðar aðstæður eru samanburðarhæf milli hlaupa og ára. Nefna má sex tíma hlaup, 12 tíma hlaup, 24, 48 og 72 tíma hlaup. Einnig má nefna 100 km hlaup í þessu sambandi. Hvað þessi hlaup varðar eru gefnar út alþjóðlegar afrekaskrár?  Segjum sem svo að við myndum halda 100 km hlaup á Íslandi og þannig væri staðið að þvi að það væri gerðar miklar athugasemdir við framkvæmdina einhverra hluta vegna af einhverjum sem málið varðar. Hægt væri að vísa slíku máli til ofurhlauparáðs FRÍ. Ef ráðið myndi komast að þeirri niðurstöðu að athugasemdir um framkvæmd hlaupsins ættu rétt á sér og væru alvarlegar þá gæti ráðið mælst til þess að árangur úr hlaupinu væri ekki birtur á alþjóðlegum samanburðarlistum. Ofurhlauparáðið gæti einnig úrskurðað um hvort árangur í hlaupi sem gerðar hefðu verið athugasemdir við væri eða væri ekki ekki metinn gildur sem íslandsmet. Einnig gæti ráðið úrskurðað um hvort ætti eða ætti ekki að dæma hlaupara úr keppni ef alvarlegar kvartanir myndi berast. Við erum að slíta barnsskónum í þessu sambandi. Að mínu mati er nauðsynlegt að hafa skýrt regluverk í kringum framkvæmd ofurhlaupa eins og kringum aðrar íþróttagreinar. Það á ekki að minnka ánægjuna af því að taka þátt í slíkum hlaupum heldur að auka hana því þá eru minni möguleikar á að upp komi ósætti og ágreiningur vegna þess að reglur eru óskýrar, túlkanir á þeim mismunandi eða jafnvel að engar reglur séu fyrir hendi. Þetta er ekki spurning um heiðarleika eða óheiðarleika heldur að fyrir hendi séu skýrar reglur sem allir hlauparar vita af fyrirfram og fara eftir þeim. Annað er ávísun á leiðindi og þau eru aldrei til bóta.

Mbk

Gunnlaugur

[Börkur (IP-tala skráð) 20.8.2010 kl. 05:49]

Ekkert nema gott um það að segja að fá Ofurhlauparáð á koppinn, vissulega þörf á ákveðinni umgjörð ekki síst þegar við erum búin að slíta barnskónum í umgjörð slíkra hlaupa.